Vətənim üçün, az da olsa, nəsə etmişəm
.
“İlin peşəkar gənci” adına layiq görülən gənclərimizdən biri də işində, peşəsində fəallığı ilə fərqlənməyi bacaran, müasir və müstəqil Azərbaycanın işıqlanması naminə fədakarcasına çalışan Aslanov Fadil Fərrux oğludur. Fadil Bakı şəhərində anadan olub. O, 2010 -cu ildə İqtisad Universitetinin nəzdində olan Maliyyə İqtisad Kollecinə daxil olur. Birinci kursu əla qiymətlərlə tamamladıqdan sonra hərbi xidmətə yola düşür.
Əsgərlik illərini fəxarətlə xatırlayan müsahibim dedi ki, Vətənə xidmətimi yüksək səviyyədə yerinə yetirərək operator, baş operator, manqa komandiri vəzifəsinə qədər yüksəldim. Bir sıra təşəkkürnamələr və Fəxri fərmanlarla təltif olundum.
Hərbi xidmətdən sonra Fadil təhsilini subbakalavr dərəcəsində tamamlayıb, müxtəlif əmək sahələrində özünü sınayır. 2016- cı ildən isə “Azərişıq” ASC-nin Maştağa Elektrik Təchizatı və Satışı İdarəsində nəzarətçi mühəndis vəzifəsində çalışır.
Ali Baş Komandan İlham Əliyevin torpaqlarımızın azadlığı uğrunda “Dəmir yumruq” əməliyyatını başlatdığı ilk gündən F.Aslanov ön cəbhədə mənfur düşmənə qarşı vuruşaraq Füzulidən Şuşakəndə qədər döyüş yolu keçir. Döyüşlərdə göstərdiyi şücaətlərə görə “Füzulinin azad olunmasına görə”, “Xocavəndin azad olunmasına görə” və “Vətən müharibəsi iştirakçısı” medalları ilə təltif olunub.
F.Aslanov işlədiyi sahədə və Vətən müharibəsindəki uğurlarından ruhlanaraq ali təhsil almaq qərarına gəlir, Qərbi Kaspi Universitetinin Dövlət bələdiyyə idarəetmə fakültəsinə daxil olur. Universitetin ictimai həyatında da fəallığı ilə seçilib. İştirak etdiyi “Zəfər günü” və “Şuşanın dağları” adlı tədbirlərdə öz təəssüratlarını tədbir iştirakçıları ilə bölüşüb.
Layiq görüldüyü fəxri addan qürur duyan peşəkar gənc qəzetimizə bunları dedi: “Bu gün sevinc hissi keçirirəm ki, Vətənim üçün, az da olsa, nəsə etmişəm. Mən fəxr edirəm ki, lazım gələndə bir “yumruq” altında birləşən xalqın nümayəndəsiyəm!”.
Sonda bu fəxri ada onu layiq gördükləri üçün üzvü olduğu Azərbaycan Həmkarlar İttifaqları Konfederasiyasına və Yerli Sənaye və Kommunal-Məişət Müəssisələri İşçiləri HİRK-ə dərin təşəkkürünü bildirdi.
Leyla BƏHRAMQIZI