73 kiloqram çəki dərəcəsində mübarizə aparan idmançımız həlledici qarşılaşmada fransalı Con Benjamin Qaba ilə üz-üzə gəlib. Rəqibinə qızıl xal bölümündə ipponla qalib gələn cüdoçumuz Olimpiya çempionu adını qazanıb və “Paris-2024”də millimizin aktivinə ilk medalı yazdırıb.

Bununla da Hidayət Heydərov bu il həm Avropa, həm dünya, həm də Olimpiya çempionu adını qazanmaqla Azərbaycan idmanının tarixinə düşüb.

Ölkəmizi təmsil edən boksçularımızdan Alfonso Dominqes (92 kq.) və Murad Allahverdiyev (80 kq.)  1/4 finala yüksəliblər. A.Dominqes avqustu7n 1-də qazaxıstanlı Aybek Oralbayla üz-üzə gələcək.

M. Allahverdiyevin ikinci görüşü avqustun 2-də olacaq. O, qazaxıstanlı Nurbek Oralbayla qarşılacaq.

İyulun 31-də Azərbaycanın üç idmançısı və bir komandası “Paris-2024” Yay Olimpiya Oyunlarında mübarizə aparacaq.

Cüdoçu Elcan Hacıyev ilk görüşünü keçirərək, 90 kiloqram çəki dərəcəsində çıxış edən idmançı Türkiyə təmsilçisi Mixael Zqankı sınağa çəkib. Rəqibinə qızıl xal bölümündə vaza-ari ilə qalib gələn Avropa çempionumuz 1/8 finala yüksəlib. Lakin bu görüş zamanı ciddi zədə alıb və rəqibinə məğlub olaraq Olimpiadada mübarizəni dayandırıb.

Ümumi məsafəni 1 saat 50 dəqiqə 36 saniyəyə qət edən Azərbaycan triatlonçusu Rostislav Pevtsov da turnirlə vidalaşıb. İdmançı finiş xəttinə 43-cü çatıb. Xatırladaq ki, ötən gün keçirilməli olan triatlon yarışı Sena çayında suyun keyfiyyətinin aşağı olması səbəbindən təxirə salınmışdı.

C və D finalına vəsiqələr üçün çıxış edən akademik avarçəkmə üzrə Azərbaycan millisinin üzvü Diana Dımçenko məsafəni 7 dəqiqə 59,23 saniyəyə qət edərək C finalına yüksəlib.

Badmintonçu Edi Reski Dviçayo E qrupundakı ikinci görüşündə danimarkalı Anders Antonsenlə üz-üzə gələcək. Təmsilçimiz ilk matçında qələbə qazanıb.

Azərbaycanın qadınlardan ibarət 3x3 basketbol millisi Olimpiadadakı ikinci oyununu ABŞ yığmasına qarşı keçirəcək. Millimiz qrupdakı ilk matçda İspaniya kollektivinə uduzub.

Qeyd edək ki, Fransanın paytaxtı Parisdə keçirilən XXXIII Yay Olimpiya Oyunlarına 48 idmançımız yollanıb. Ölkəmizi 15 idman növündə təmsil edən idmançılarımızdan bir qismi artıq mübarizəni dayandırıb.

Azər MUSTAFAYEV