İyulun 8-də Prezident İlham Əliyevin sədrliyi ilə Nazirlər Kabinetinin 2018-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclası keçirilib. İclasda çıxış edən ölkə başçısı bir sıra mühüm məsələlərə toxunub.

Millət vəkili Əli Məsimli deyib ki, Nazirlər Kabinetinin iclasında Prezident İlham Əliyev islahatların dərinləşdirilməsi, o cümlədən kadr islahatlarının davam etdirilməsi, sosial təminat sahəsində ciddi islahatların aparılması, korrupsiyaya və rüşvətxorluğa qarşı mübarizənin gücləndirilməsi, Mingəçevir İstilik Elektrik Stansiyasında baş vermiş qəza və sair bu kimi məsələlərə dair bir sıra mühüm mesajlar verdi. Bütün bunlarla yanaşı, tikinti sektorunda yaranmış vəziyyətlə bağlı verilən mesajlar da xüsusi aktuallıq kəsb edir. Prezident bildirdi ki, “narahatlıq doğuran sahələrdən biri də inşaat sektorudur. Son illərdə inşaat sektorunda böyük işlər görülüb. Bakı bu gün dünyanın ən gözəl şəhərlərindən biridir. Ancaq eyni zamanda Bakı şəhərində elə yerlər var ki, utanc gətirir. Binalar heç bir qaydaya riayət olunmadan bir-birinin yanında, ictimai yerlərdə, həyətlərdə tikilir.... Bir çox hallarda aparılan tikintilər heç bir meyara sığmır, nə şəhərsalma meyarlarına, nə tikinti meyarlarına. Bəzən memarlıq baxımından çox eybəcər binalar tikilir. Buna son qoymaq üçün çox ciddi tədbirlər görülməlidir və qanunsuz tikililərə son qoyulmalıdır.”

Həqiqətən də inşaat sahəsində görülən müsbət işlərlə yanaşı, öz həllini gözləyən xeyli ciddi problemlər də var.Yeni tikilən binaların bir hissəsi milli arxitekturaya əməl edilməklə tikildiyindən zövq oxşayır, qalanları isə çox zövqsüz və görkəmi Bakı üçün xarakterik olan arxitekturaya heç uyğun gəlmir. Bakının mərkəzi hissələrinin çox gözəl olması dünyanın hər yerindən gələn qonaqların da təsdiq etdikləri bir reallıqdır. Amma, çox təəssüf ki, bu dediklərimiz Bakının yalnız mərkəzi hissəsinə aiddir və paytaxt meyarları ilə yanaşanda, şəhərin qalan hissələri arzu olunan vəziyyətdən çox uzaqdır. İndiyədək Bakının dörd planı olub, onların gerçəkləşdirilməsində faydalı işlərlə yanaşı, həm də xeyli qüsurlara yol verilib. Son 30 ildə, xüsusən də “neft bumu” ilə müşayiət olunan “tikinti bumu” müsbət meyilləri ilə yanaşı, bir sıra hallarda həm də xaotik xarakter daşıyıb. Bu isə təkcə şəhərimizin gözəlliyinə yox, hətta unikal arxitektura və mədəniyyət incimiz olan “İÇƏRİŞƏHƏR”ə belə mahiyyətinə uyğun gəlməyən binalar tikilməklə ziyan vurub. Xeyli faktlar var ki, Bakıda binalar tikilən zaman çox yerdə ağaclar kəsilib, bir sıra yerlərdə yaşıllıqlar vəhşicəsinə məhv edilib. Bina tikənlər hərəsi öz binasını əsas yoldan yarım metr-bir metr irəli çəkməklə çox yerdə piyada yollarına yer qoymayıblar.

Əli Məsimli bildirib ki, Bakının mərkəzi və birinci dairəsində sökülən yerlərdə başqa binalar, restoranlar və digər obyektlər yox, əksər inkişaf etmiş ölkələrdə və normal inkişaf etməkdə olan ölkələrdə olduğu kimi, yaşıllıq zonaları, parklar, bağlar, bağçalar salınsın. Qədim abidələr söküntüyə məruz qalmasın, olduğu kimi saxlanılsın və ya restovrasiya olunsun. Bu baxımdan Bakının mərkəzi sayılan kiçik bir sahə ilə yanaşı, Bakı-Mərkəz Planlaşdırma Zonasına aid edilən bütün sahələri (Səbail, Yasamal, Nəsimi, Nərimanov, Nizami, Xətai və Binəqədi rayonları, Əhmədli, Keşlə və M.Ə.Rəsulzadə qəsəbələri) paytaxt sözünün məna yükünə uyğun vəziyyətə gətirmək, abadlaşdırmaq, insanların yaşaması və işləməsi üçün əlverişli vəziyyətə gətirmək çox zəruridir. Çox istərdik ki, Bakının sayca beşinci Baş Planı reallaşan zaman kommersiya maraqları yeni baş planda həyata keçirilməsi çox vacib olan məsələləri arxa plana itələməsin. Qarşıdakı 20 ildə onun nəzərdə tutulan kimi sistem şəkildə reallaşdırılması Bakını və onun ətrafını dünyanın ən gözəl məkanlarından birinə çevirə bilər.

Millət vəkili Vahid Əhmədov ölkə başçısının tənqid etdiyi məsələlər sırasında korrupsiya və rüşvətxorluq hallarının olduğunu da diqqətə çatdırıb. Deputat bildirib ki, Prezidentin qeyd etdiyi kimi, bu məsələ ciddi nəzarətdə saxlanacaq: “Bu sahəyə diqqətin yüksək olması korrupsiya və rüşvətxorluqla mübarizə aparılması əhalinin rahatlığı üçün də müsbətdir. Bir neçə gün əvvəl Mingəçevir İES-də baş verən qəza hadisəsi də Prezident İlham Əliyevin iclas gündəliyində mühüm yer aldı. Ölkə başçısı qeyd etdi ki, bununla bağlı komissiya yaradılıb və araşdırmaların yekunları barədə məlumat veriləcək. Bu məsələdə günahı olmayan şəxsləri cəzalandırası deyilik. Yalnız bu hadisədə məsuliyyətli olan, nöqsana yol verən səlahiyyətlilər cəza tədbirlərinə məruz qalacaq”.

Millət vəkili Hadi Rəcəbli deyib ki, ölkədə görülən sosial, iqtisadi, siyasi və digər tədbirlərin əsasında Azərbaycan vətəndaşının güzəranının yaxşılaşdırılması durur. 

İdarəetmə strukturlarında aparılan islahatlar, sosial, iqtisadi layihələr, görülən işlər hamısı dövlət başçısının Azərbaycan vətəndaşı üçün gördüyü işlərdir: “2018-ci ilin birinci rübündə də inkişaf strategiyası davam etdirilib. Bütün bunların nəticəsi vətəndaşlarımızın güzəranının yaxşılaşmasında özünü göstərir. Aydın məsələdir ki, Azərbaycanın hazırkı inkişafı 15-20 il əvvəlki çətinlikləri, demək olar ki, tamamilə unutdurub. Enerji problemləri, sosial çətinliklər, insanların narahatlığı artıq aradan qalxıb. Buna görə bütün sahələrdə inkişaf gözə çarpır.

Sosial siyasət məsələsində də qarşıya qoyulmuş məqsədlərə nail olmaq üçün 2018-ci ilin birinci rübündə müxtəlif addımlar atıldı. Bu siyasətin gerçəkləşmə mexanizminin əsas elementi isə iqtisadiyyatı inkişaf etdirməkdir. Çünki iqtisadiyyatda uğur qazanmadan, yüksək maliyyə imkanlarına nail olmadan sosial siyasəti lazımi səviyyədə inkişaf etdirmək mümkün deyil. Ona görə ölkə başçısı tərəfindən Azərbaycanın iqtisadi inkişafına yüksək diqqət ayrılır”.