Azərbaycan Respublikasının Prezidenti İlham Əliyev
(avqustun 30-da) ... Sinqapur şəhərində keçirilən yeniyetmələrin I olimpiya oyunlarında Azərbaycan Respublikasının idmançıları və onların məşqçiləri üçün ən yüksək nəticələrə görə mükafatların müəyyən edilməsi haqqında sərəncam imzalamışdır. … Sinqapurda keçirilən yeniyetmələrin I yay olimpiya oyunlarında iştirak etmiş idmançıları və mütəxəssisləri qəbul etmişdir.
(avqustun 31-də) … Müqəddəs Ramazan ayı münasibətilə müsəlman ölkələrinin Azərbaycandakı səfirlərini və diplomatik nümayəndəliklərinin rəhbərlərini qəbul etmişdir.
(sentyabrın 1-də) … və xanımı Mehriban Əliyeva Bakıda Dövlət Bayrağı Meydanının təntənəli açılış mərasimində iştirak etmişlər.
(sentyabrın 2-də) … və xanımı Mehriban Əliyevanın adından ölkəmizə rəsmi səfərə gələn Rusiya Federasiyasının Prezidenti Dmitri Medvedevin və xanımı Svetlana Medvedevanın şərəfinə "Gülüstan" sarayında rəsmi ziyafət təşkil edilmişdir.
(sentyabrın 3-də) … və Rusiyanın dövlət başçısı Dmitri Medvedevin görüşündə Azərbaycan və Rusiya arasında dövlət sərhəddi, təbii qazın alqı-satqısı və Samur çayı ilə bağlı sənədlər imzalanmışdır. … və Rusiya Prezidenti Dmitri Medvedev mətbuat konfransında bəyanatla çıxış etmişlər.
Sənaye və Energetika Nazirliyi qeyri-neft sektorunun inkişafına dair Dövlət Proqramını hökumətə təqdim etməyə hazırlaşır. 2007-2012-ci illəri əhatə edən sənəddə neftdən kənar sahələrə sərmayə axınlarının konkret istiqamətləri müəyyən olunacaq. Sənaye və Energetika naziri Natiq Əliyev bildirib ki, ölkənin qeyri-neft sənayesinin vəziyyəti təhlil edildikdən sonra bu sahənin gələcək inkişafının əsas istiqamətləri müəyyənləşdiriləcək. Mütəxəssislər qərara gəlib ki, yerli xammal bazası həmin sahələrin inkişafı üçün mühüm əhəmiyyət daşıyır. N.Əliyev deyib ki, özünün ciddi xammal bazasına malik olan sahələr proqramda prioritet təşkil edir. Nazirin qənaətinə görə, qeyri-neft sektorunun inkişafı respublikamıza başqa dövlətlərdən asılı olmamaq üçün lazımdır. İqtisadiyyatın müvafiq sektorlarının inkişafı üçün əsas amil texnologiyaların əldə edilməsidir. "Əgər biz rəqabətədözümlü istehsal səviyyəsinə çıxmaq və məhsulun Avropa standartlarına uyğun olmasını istəyiriksə, yeni texnologiyalar lazımdır. Biz hər bir sahədə texnologiyaların mövcudluğunun səviyyəsini müəyyənləşdiririk" - deyə, nazir bildirib. Hesablamalara görə, hazırda ölkəmizdə mövcud kimya sənayesi müəssisələrinin fəaliyyətinin tam bərpası üçün 1 milyard dollardan çox vəsait lazımdır. N.Əliyev xatırladıb ki, əcnəbi məsləhətçilərin qiymətləndirməsinə görə, hələ 1994-95-ci illərdə Azərbaycanın kimya sənayesinin bütün gücü ilə işə düşməsi yarım milyard dollar həcmində dəyərləndirilirdi. Müəssisələrdəki avadanlıqlar istismar müddətini başa vurub. Bunların yenidən qurulması və ya əsaslı təmiri ciddi vəsaitlər tələb edir. Bütün bu problemlərin həlli yollarının qeyri-neft sektorunun inkişafına dair Dövlət Proqramında əks olunduğunu deyən nazir, dünya bazarında rəqabət qabiliyyətlilik üçün idarəetmə sisteminin modernləşdirilməsini və xüsusi vergi-fiskal sisteminin tətbiqini zəruri sayır: "İlk növbədə təkmilləşmiş yeni vergi, gömrük rejimi yaradılmalıdır. Bundan ötrü qanunvericilikdə yol verilən boşluqlar doldurulmalıdır. Başqa sözlə, yeni qanunlar hazırlamaq gərəkdir ki, onlar insanları və kapitalı qeyri-neft sektoruna cəlb etmək iqtidarında olsun". Nazir vergi rejimi çərçivəsində pul qoyuluşlarının azaldılması və avadanlıqların gömrük rüsumlarından azad edilməsinin planlaşdırıldığını deyib.
Ali məktəblərin birində laborant işləyirəm. 4 yaşlı qızım var. Ana-bala hər ikimiz xroniki xəstəyik. Mənə düşən ödənişsiz məzuniyyətlər barədə məlumat verməyinizi xahiş edirəm.
Elza HƏSƏNOVA, Samux rayonu.
- Əmək Məcəlləsinin 128-130-cu maddələrinə əsasən, qohumluq borcunun yerinə yetirilməsi ilə bağlı ailə, məişət və başqa sosial məsələləri təxirə salmadan həll etmək, təhsil almaq, yaradıcı elmi işlə məşğul olmaq üçün, habelə yaşına, fizioloji keyfiyyətlərinə görə işdən ayrılmaq zərurəti olduqda işçinin ödənişsiz məzuniyyətlərdən istifadə etmək hüququ vardır. Ödənişsiz məzuniyyətlər bu Məcəllədə nəzərdə tutulmuş hallarda işçilərin xahişi və ya tərəflərin qarşılıqlı razılığı ilə verilir. İşəgötürənlə işçinin qarşılıqlı razılığına əsasən, həmçinin kollektiv müqavilələrdə nəzərdə tutulan hallarda, o cümlədən əmək müqaviləsi ilə müəyyən edilən şərtlərlə işçilərə müddəti altı aydan çox olmayaraq tərəflərin mülahizəsinə əsasən müəyyən edilən ödənişsiz məzuniyyət verilə bilər. İşçilərin xahişi ilə bir iş ilində aşağıdakı hallarda və müddətdə ödənişsiz məzuniyyətlər verilir: həkim məsləhət komissiyasının rəyi əsasında xroniki xəstəliyə tutulmuş uşağı olan valideynlərdən birinə, yaxud ailənin uşağa bilavasitə qulluq edən digər üzvünə - uşaq dörd yaşına çatanadək; əlillik qrupundan və səbəbindən asılı olmayaraq əlillərə, sağlamlıq imkanları məhdud olan 18 yaşınadək işçilərə - bir təqvim ayınadək; qazanılmış immunçatışmazlığı sindromu (AİDS) xəstəliyinə tutulmuş və ya insanın immunçatışmazlığı virusu (HİV) ilə yoluxmuş uşaq böyüdən, həmçinin sağlamlıq imkanları məhdud 18 yaşınadək uşağı olan valideynlərə - 14 təqvim gününədək; ailənin xəstə üzvünə qulluq edən qohumlardan birinə - səhiyyə müəssisəsinin rəyi ilə 14 təqvim gününədək; sağlamlıq imkanları məhdud 18 yaşınadək uşaqları olan işçilərə - 14 təqvim gününədək; ailə, məişət və başqa sosial məsələləri həll etmək üçün işçilərə -7 təqvim gününədək. Bu ödənişsiz məzuniyyətlər Əmək Məcəlləsində nəzərdə tutulan minimum məzuniyyətlərdir. Eyni zamanda əmək müqaviləsində nəzərdə tutulduğu halda, hər iki tərəfin razılığı (işçinin və işəgötürənin) və ya Kollektiv müqavilələrdə nəzərdə tutulan hallarda ödənişsiz məzuniyyətlər daha çox müddətə verilə bilər. Əmək Məcəlləsinin 245-ci maddəsinə əsasən, 14 yaşına çatmamış uşağı, yaxud sağlamlıq imkanları məhdud uşağı olan, habelə tibbi rəy əsasında xəstə ailə üzvünə qulluq edən qadınların xahişi ilə işəgötürən onlara işlənmiş vaxta mütənasib əməkhaqqı ödənilən natamam iş günü və ya natamam iş həftəsi müəyyən etməlidir. Bu halda qadının gündəlik və ya həftəlik iş vaxtının müddəti tərəflərin razılığı ilə müəyyən edilir. Həm özünüz və həm də uşağınız xroniki xəstə olduğu üçün ödənişsiz məzuniyyətlərdən istifadə etməklə bərabər Əmək Məcəlləsinin 245-ci maddəsində nəzərdə tutulan işlənmiş vaxta mütənasib əməkhaqqı ödənilən natamam iş günü və ya natamam iş həftəsi hüququndan istifadə etməyiniz daha düzgündür. Belə olan halda siz həm işəgötürənə ziyan vurmamaqla əmək funksiyalarınızı yerinə yetirmiş olursunuz və eyni zamanda xəstəliyin müalicəsi ilə əlaqədar müəyyən vaxt qazanmış olursunuz.
NATİQ ƏLİYEV: HÖKUMƏTƏ YENİ İNKİŞAF PROQRAMI TƏQDİM EDƏCƏYİK