İlin son yaddaqalan saatları


Baxıldı : 142

Tarix : 2018-01-05 23:00:07


Dekabrın 27-də Bakı Biznes Mərkəzində ali məktəb tələbələri üçün təşkil olunmuş bayram süfrəsində ən çox diqqətçəkən məqam məclisin bütünlüklə iştirakçıların ixtiyarına buraxılması idi. Yəni məclisin axarını təşkilatçıların əvvəlcədən yazıb hazırladığı qaydalar deyil, iştirakçıların əhvali-ruhiyyəsi müəyyənləşdirdi.

Bayram şənliyini giriş sözü ilə Təhsil İşçiləri Azad Həmkarlar İttifaqı Respublika Komitəsinin sədr müavini Mirzə Cəfərzadə açdı. O, 20 universitetdən gəlmiş 120 tələbəyə qarşıdan gələn Yeni il, Dünya Azərbaycanlılarının Həmrəyliyi Günü münasibətilə Azərbaycan Həmkarlar İttifaqları Konfederasiyasının sədri, millət vəkili Səttar Möhbalıyevin təbriklərini və arzularını çatdırdı. Dedi ki, Səttar müəllim başda olmaqla, AHİK və sahə həmkarlar ittifaqı Respublika Komitəsinin ümdə istəklərindən biri də savadlı, əxlaqlı, vətənpərvər nəsil formalaşdırmaqdır. Bu istəyimizə nail olmaqdan ötrü imkanlarımızdan maksimum istifadə etməyə çalışırıq. Təbii ki, cəmiyyətimizin inkişafı ilk növbədə vətəndaşların intellektual səviyyəsindən və fəal mövqeyindən asılıdır. Hələ 1995-ci ildə TİAHİ-nin təsis etdiyi "Adlı təqaüd" nominasiyası da tələbələrdə bu keyfiyyətləri aşılamağa xidmət edir. Bu təqaüd ildə iki dəfə təhsildə fərqlənən və universitetin ictimai həyatında fəallıq göstərən tələbələrə verilir.

Mirzə müəllim bildirdi ki, Respublika Komitəsi Təhsil Nazirliyi ilə birlikdə intellektual oyunlar, festivallar, müsabiqələr, spartakiadalar, idmanın müxtəlif növləri üzrə yarışlar keçirməklə tələbə-gənclərin həm elmə, təhsilə marağını artırır, həm də fiziki sağlamlığının möhkəmlənməsinə şərait yaradır.

M.Cəfərzadə təmsil etdiyi qurumun tələ

bələr, bütövlükdə gənclər arasında apardığı maarifləndirmə işlərindən də danışdı. "Bütün bu tədbirlərin həyata keçirilməsi ona gətirib çıxarır ki, gənclərimiz hazırda bəşəriyyəti narahat edən pis vərdişlərdən çəkindirilir. Cəmiyyətimizin mənəvi və fiziki cəhətdən sağlam qurucusu kimi formalaşırlar", - dedi.

Sədr müavini çıxışının sonunda bir daha tədbir iştirakçılarını hər iki əlamətdar gün münasibətilə təbrik etdi, onlara təhsildə və şəxsi həyatlarında uğurlar arzuladı.

Sonra mərasim tələbələrin ixtiyarına verildi. Aparıcı - Azərbaycan Dövlət Mədəniyyət və İncəsənət Universitetinin II kurs tələbəsi Esmiralda Abdullayeva üzərinə milli mətbəximizin nemətləri düzülmüş stolların arxasında əyləşmiş həmyaşıdlarını rəqsə dəvət etdi. Rəqslər tələbələrin sifarişləri əsasında seçilirdi. Hər bir tələbə cidd-cəhdlə öz rəqs məharətini göstərirdi.

Şaxta baba Qar qızın assisentliyi ilə viktorina keçirdi. Suallara dürüst cavab verən, rəqs yarışında qalib gələn tələbələr suvenirlərlə mükafatlandırıldılar. Azərbaycan Dövlət Mədəniyyət və İncəsənət Universitetinin, Bakı Musiqi Akademiyasının ansambllarının müşayiəti altında gözəl səsə malik tələbələr də öz məharətlərini nümayiş etdirdilər. Mərasim xoş əhvali-ruhiyyə ilə başa çatdı.

Mərasimin bir neçə iştirakçısının təəssüratlarını öyrəndik. Azərbaycan Dövlət Neft və Sənaye Universitetinin II kurs tələbəsi Aysel Bədəlzadə və Azərbaycan Dillər Universiteti Tələbə Həmkarlar İttifaqı Komitəsinin sədri Aytəkin Mehtiyeva bu gün yaşadıqları xoş saatlara görə sahə Hİ Respublika Komitəsinə minnətdarlıqlarını bildirdilər. Dedilər ki, biz istər təhsildə, istərsə də asudə vaxtlarımızda həmişə həmkarlar ittifaqının qayğısını üzərimizdə hiss etmişik. Bu təşkilat bizim həyatımızın ayrılmaz hissəsidir.

Bəyalı RZAYEV