Kollektiv müqavilə imzalandı


Baxıldı : 60

Tarix : 2017-10-20 17:55:27


Oktyabrın 20-də Azərbaycan Dövlət Pedaqoji Universitetinin rektorluğu ilə həmkarlar ittifaqı komitəsi arasında 2017-2019-cu illər üçün kollektiv müqavilənin imzalanması mərasimi keçirilib.

İmzalanma mərasimində rektorluğun nü-mayəndələri, həmkarlar ittifaqının fəalları iştirak ediblər. Mərasimdə çıxış edən Təhsil İşçiləri Azad Həmkarlar İttifaqı Respublika Komitəsinin sədr müavini Mirzə Cəfərzadə kollektiv müqavilənin hazırlanma prosesindən danışıb. Deyib ki, bu sənəddə işçilərin maraqları ön planda olsa da, universitetin mövcud durumu və rektorluğun səlahiyyət dairəsi və digər imkanlar da nəzərə alınıb.

Mirzə müəllim tövsiyə edib ki, Əmək Məcəlləsində yazılmış maddələrdə əksini tapmış hüquqlar minimum hədd hesab olunmalıdır. Kollektiv müqavilədə işçilərin əmək, sosial, istirahət və sair hüquqları, o cümlədən müavinətlər, əlilliyə, toya, yasa, bayramlara, əlamətdar günlərə… görə ödənişlər qanunvericilikdə müəyyənləşdiyindən mümkün qədər üstün olmalıdır. Kollektiv müqavilənin yerinə yetirilməsinin gedişi ən azı ildə iki dəfə rektorluğun və həmkarlar ittifaqı komitəsinin birgə iclasında müzakirə edilməlidir.

Mərasimdə çıxış edən universitetin rektoru Cəfər Cəfərov kollektiv müqavilənin tərəfdaşların hər ikisi üçün eyni dərəcədə faydalı və vacib olduğunu söylədi. Dedi ki, bu sənəd ümumilikdə təhsilin keyfiyyətcə yüksəlməsinə xidmət göstərir. Biz onun icrasını diqqətdə saxlayacaq, tam həyata keçirilməsinə çalışacağıq.

Sonra kollektiv müqaviləni universitetin rektoru Cəfər Cəfərov və həmkarlar ittifaqının sədri Vaqif Əliyev imzaladılar.

Bəyalı RZAYEV