“Nə? Harada? Nə zaman?"


Baxıldı : 47

Tarix : 2017-12-27 19:02:14


Dünən Avropa otelində  Təhsil İşçiləri Azad Həmkarlar İttifaqının xidmətində olan 20 ali məktəbin tələbələrinin iştirakı ilə ənənəvi XI "Nə? Harada? Nə zaman?" intellektual oyun keçirilib. Tədbiri giriş sözü ilə sahə Hİ Respublika Komitəsinin sədr müavini Mirzə Cəfərzadə açdı. O, tələbə gənclərə komitənin sədri, millət vəkili Səttar Möhbalıyevin salamlarını və xoş arzularını çatdırdı. Tələbə gənclərə göstərilən diqqət və qayğıdan, onların yaxşı təhsil almaları, fiziki cəhətdən sağlam olmaları, layiqli vətəndaş kimi formalaşmaları üçün göstərilən işlərdən danışdı. Dedi ki, belə tədbirlər gənclərin asudə vaxtının səmərəli təşkilinə xidmət edir. Onların zərərli vərdişlərdən, pis adətlərdən uzaq olmalarına kömək göstərir.

Mirzə müəllim çıxışının sonunda tədbir iştirakçılarını, onların timsalında bütün tələbə gəncləri qarşıdan gələn Yeni il və 31 dekabr - Dünya Azərbaycanlılarının Həmrəyliyi Günü" münasibətilə təbrik etdi, hər birinə təhsildə, şəxsi həyatda uğurlar arzuladı.

Sonra yarışın münsiflər heyətinin rəhbəri oyunun qaydaları barədə məlumat verdi və yarış başlandı.

3 saata yaxın davam edən maraqlı və gərgin yarışda Bakı Mühəndislik Universiteti komandası ən yaxşı nəticə ilə qalib adına layiq görüldü.

II yerə Azərbaycan Dövlət İqtisad Universiteti, III yerə Azərbaycan Dövlət Neft və Sənaye Universitetinin komandaları sahib oldular.