Qaliblər mükafatlandırılıb


Baxıldı : 37

Tarix : 2017-09-16 00:39:07


Sentyabrın 8-də Fövqəladə Hallar Nazirliyi (FHN) İşçiləri Həmkarlar İttifaqının və Dövlət Yanğından Mühafizə Xidmətinin (DYMX) təşkilatçılığı ilə keçirilən yanğın-xilasetmə idmanı üzrə respublika birinciliyi başa çatıb.

Yanğın-xilasetmə idmanı üzrə respublika birinciliyinin zonalar üzrə keçirilmiş birinci mərhələsinin final mərhələsinə vəsiqə qazanmış qaliblərin iştirak etdiyi yarışda 12 komanda və 150 idmançı 3 mərhələdə - təlim qülləsinə qalxmaq, 100 metrlik maneə zolağını dəf etmək və döyüş açılışı üzrə yarışlarda öz qüvvələrini sınayıblar.

Respublika birinciliyinin başa çatması münasibətilə DYMX-nin idman-məşq kompleksində təntənəli mərasim təşkil olunub. Tədbirdə FHN İşçiləri Həmkarlar İttifaqının sədri  Mehman İsmayılov, Dövlət Yanğından Mühafizə Xidmətinin şöbə rəisi, daxili xidmət polkovniki Azad Əliyev çıxış edərək yanğın-xilasetmə idman növünün inkişaf etdirilməsinin, bu sahəyə əməkdaşların daha çox cəlb olunmasının vacibliyini vurğulayıblar.

Sonra yanğın-xilasetmə idmanı üzrə respublika birinciliyinin qalibləri elan olunub.

Döyüş açılışı üzrə yarışda Səbail rayon DYMH-nin  komandası 1-ci  yerə,  Azərbaycan Respublikası Dövlət Neft Şirkətinin (ARDNŞ) obyektləri üzrə Yanğından Mühafizə İdarəsinin 1-ci komandası 2-ci yerə, Xətai rayon DYMH-nin  komandası isə 3-cü yerə çıxıb. Hücum nərdivanı yarışında ən yaxşı nəticəni ARDNŞ-in obyektləri üzrə Yanğından Mühafizə İdarəsinin 1-ci komandasından  Asəf İbrahimov göstərib.  Səbail rayon DYMH-nin əməkdaşı Əmin Kərimxanlı ikinci, Nəsimi rayon DYMH-nin əməkdaşı Seymur Məmmədov isə üçüncü olub.

100 metrlik maneəli zolaq üzrə yarışda qalib adını ARDNŞ-in obyektləri üzrə Yanğından Mühafizə İdarəsinin 1-ci komandasını təmsil edən Anar Quliyev qazanıb. Sumqayıt Şəhər Dövlət Yanğından Mühafizə İdarəsinin əməkdaşı Vüsal Tahirov və ARDNŞ-in obyektləri üzrə Yanğından Mühafizə İdarəsinin 1-ci komandasından Rövşən Heydərov müvafiq olaraq ikinci və üçüncü yerləri bölüşüblər. 

Yanğın-xilasetmə idmanı üzrə respublika birinciliyinin ümumi nəticəsinə görə, komanda hesabında fəxri kürsünün ilk pilləsinə ARDNŞ-in obyektləri üzrə Yanğından Mühafizə İdarəsinin 1-ci komandası qalxıb.  İkinci yerə Səbail rayon DYMH-nin, üçüncü yerə Sumqayıt Şəhər Dövlət Yanğından Mühafizə İdarəsinin komandaları  layiq görülüb.

Qaliblərə  medal və diplomlar, qiymətli hədiyyələr təqdim edilib.

***

Sentyabrın 13-də Qəbələ rayonunda Fövqəladə Hallar Nazirliyi İşçiləri Həmkarlar İttifaqı və İdman-Sağlamlıq Klubu tərəfindən birgə keçirilən səmti müəyyənetmə idman növü üzrə FHN-in V respublika çempionatının final mərhələsi yekunlaşıb.

Qəbələ rayonundakı meşə massivində keçirilən yarışın bağlanış mərasimində FHN İşçiləri Həmkarlar İttifaqının sədri Mehman İsmayılov və FHN İdman-Sağlamlıq Klubunun rəisi, polkovnik Füzuli Musayev nitq söyləyiblər. Məlumat verilib ki, FHN-in qurumları arasında keçirilən səmti müəyyənetmə idman növü üzrə V ölkə çempionatında 19 qurumdan 19 komanda olmaqla 91 kişi və 5 qadın idmançı iştirak edib. İki gün davam edən yarışın final mərhələsində nazirliyin qurumlarının əməkdaşları komanda və şəxsi birincilik üzrə öz bacarıqlarını göstəriblər.

Natiqlər səmti müəyyənetmə idman növü üzrə ölkə çempionatında ilk 3 yeri tutan əməkdaşları, komandaların üzvlərini təbrik edib, ölkəmizdə bu idman növünün inkişafı üçün görülən işlərdən, əldə edilən uğurlardan danışıblar.

Yarışda FHN-in Tikintidə Təhlükəsizliyə Nəzarət Dövlət Agentliyinin komandası birinci, nazirliyin Mərkəzi Aparatının komandası ikinci, Kiçik Həcmli Gəmilərə Nəzarət və Sularda Xilasetmə Dövlət Xidmətinin komandası üçüncü yeri tutub. Qızlar arasında şəxsi yarışlarda Tikintidə Təhlükəsizliyə Nəzarət Dövlət Agentliyinin əməkdaşı Sevda Verdiyeva qalib olub. Xüsusi Riskli Xilasetmə Xidmətinin əməkdaşı Arzu Eyvazova ikinci, Cənub Regional Mərkəzinin əməkdaşı Nigar Məmmədova isə üçüncü sırada qərarlaşıb. Kişilərin yarışında isə FHN-in Aviasiya Dəstəsinin əməkdaşı Pərvin Əliyev birinci, Dövlət Yanğından Mühafizə Xidmətinin işçisi Şahin Həmidov ikinci, Mülki Müdafiə Qoşunlarının əməkdaşı Şükür Şükürlü üçüncü yerə çıxıb.

Sonda qaliblərə medal, diplom, kubok və qiymətli hədiyyələr təqdim olunub.

Xatırladaq ki, FHN-in əməkdaşları səmti müəyyənetmə idman növü üzrə Azərbaycan milli yığma komandasının heyətinə cəlb olunaraq dünya və Avropa çempionatlarında iştirak edəcəklər.

Azər MUSTAFAYEV