Yeni sədr seçildi


Baxıldı : 49

Tarix : 2017-11-04 04:35:43


Oktyabrın 30-da Təhsil İşçiləri Azad Həmkarlar İttifaqı Şəmkir Rayon Komitəsinin növbədənkənar iclası keçirilib. İclasda rayon komitəsinin sədri Məzahir Hüseynlinin öz xahişi ilə işdən azad olunması ilə bağlı ərizəsinə baxılıb. Ərizədə səbəb kimi M.Hüseynlinin səhhətinin işləməsinə imkan verməməsi göstərilib.

İclas iştirakçıları Məzahir müəllimin təcrübəli, peşəkar işçi olduğunu söylədilər. Dedilər ki, o, həmkarlar ittifaqının cəsarətli təşkilat kimi tanınması üçün çox iş görüb, rayonun ictimai həyatında fəal iştirak edib.

Rayon icra hakimiyyəti başçısının birinci müavini Qüdrət Əliyev, təhsil şöbəsinin müdiri Məcnun Şıxlinski də  M.Hüseynlinin Şəmkirdə təhsilin inkişafı, gənc nəslin layiqli vətəndaş ruhunda böyüməsi istiqamətində görülən işlərə öz imkanı daxilində göstərdiyi köməyi diqqətə çatdırdılar.

Təhsil İşçiləri Azad Həmkarlar İttifaqı Respublika Komitəsinin sədr müavini Mirzə Cəfərzadə Məzahir müəllimə həmkarlar ittifaqında xidmətlərinə görə təşəkkür etdi. Yeni seçiləcək sədrin və komitə üzvlərinin üzərinə düşən vəzifələrdən danışdı və onlara tövsiyələrini verdi. Dedi ki, ittifaqın oktyabrın 9-da keçirilmiş XVII konfransı son 5 ildə görülən işləri ciddi təhlil etdi və yeni istiqamətlər müəyyənləşdirdi. Bütün strukturlara tapşırıldı ki, təhsil sahəsində çalışanların, eyni zamanda təhsil alan gənclərin ittifaqın sıralarına cəlb olunması işi davam etdirilsin, təşkilatın strukturları möhkəmləndirilsin. İlk təşkilatlarla əlaqə gücləndirilsin. Həmkarlar ittifaqlarına seçilmiş yeni üzvlər təlimatlandırılsın. Təhsil işçilərinin peşəkarlıq səviyyəsinin yüksəldilməsi ilə bağlı təhsil müəssisələrində lazımi şəraitin yaradılmasına nəzarət artırılsın.Təhsil müəssisələrində işçilərlə işəgötürənlər arasında əmək müqaviləsinin bağlanması, dəyişdirilməsi və ya ləğv olunması zamanı qanunvericiliyin tələblərinin pozulması hallarına yol verilməməlidir.

Mirzə müəllim digər məsələlər və vəzifələri də iclas iştirakçılarının diqqətinə çatdırdı.

Sonra təşkilati məsələyə baxıldı. M.Hüseynlinin işdən azad olunma ərizəsi qəbul edildi. Sədr vəzifəsinə Həsən İsmayılov seçildi.

B.RZAYEV