Azərbaycan Respublikasının Prezidenti İlham Əliyev
(mayın 13-də) …Beynəlxalq Velosipedçilər İttifaqının Prezidenti Patrik Mak Quaydı qəbul etmiş, ölkəmizdə ümummilli lider Heydər Əliyevin xatirəsinə həsr olunmuş beynəlxalq velosiped turunun keçirilməsinin əhəmiyyətini və bu beynəlxalq tədbirin təkcə paytaxtı deyil, regionları da əhatə etməsinin önəmini qeyd etmişdir.
(mayın 14-də) …Bolqarıstan Respublikası Xalq Məclisinin sədri xanım Tsetska Tsaçevanın başçılıq etdiyi nümayəndə heyətini qəbul etmiş, ölkələrimiz arasında əlaqələrin zəngin tarixə malik olduğunu və yüksək səviyyədə təmasların səmərəli nəticələr verdiyini diqqətə çatdırmışdır. …ATƏT-in Minsk Qrupunun həmsədrləri İqor Popovu (Rusiya), Robert Bradtkeni (ABŞ), Jak Foru (Fransa) və ATƏT-in hazırkı sədrinin xüsusi nümayəndəsi Anji Kaspşiki qəbul etmiş, Ermənistan-Azərbaycan, Dağlıq Qarabağ münaqişəsinin nizama salınması ilə bağlı danışıqların hazırkı vəziyyəti və perspektivləri ilə bağlı məsələləri müzakirə etmişdir.
(mayın 15-də) …MDB-nin üzvü olan ölkələrin Dövlət Başçıları Şurasının qeyri-rəsmi iclasında iştirak etmək üçün Rusiya Federasiyasının paytaxtı Moskvaya işgüzar səfərə gəlmişdir. …Moskvada MDB-nin üzvü olan ölkələrin Dövlət Başçıları Şurasının qeryi-rəsmi iclasında iştirak etmişdir. …və Moldova Respublikasının Prezidenti Nikolaye Timovtin Moskvada görüşmüş, Azərbaycan ilə Moldova arasında enerji, sərmayələrin yatırılması və digər sahələrdə əməkdaşlığın inkişafı üçün böyük potensialın olduğunu qeyd etmişlər. …və Qırğız Respublikasının Prezidenti Almazbek Atambayev Moskvada görüşmüş, ölkələrimiz arasında ikitərəfli əlaqələrin müxtəlif istiqamətlərdə inkişafından, eləcə də hökumətlərarası komissiyanın fəaliyyətindən məmnunluq ifadə etmişlər.
(mayın 16-da) …Rusiya Federasiyasına səfərini başa vuraraq həmin gün Bakıya qayıtmışdır. …Daxili İşlər Nazirliyinin Zuğulbada inşa edilmiş "Xəzri" İstirahət və Sağlamlıq Mərkəzinin açılışı mərasimində iştirak etmişdir. …Azərbaycan ədəbiyyatının inkişafında mühüm xidmətləri olan Mirvarid Dilbazinin 100 illik yubileyinin layiqincə keçirilməsi haqqında Sərəncam imzalamışdır.
(mayın 17-də) …Özbəkistan Respublikasının ölkəmizdə yeni təyin olunmuş fövqəladə və səlahiyyətli səfiri Şerzod Fayziyevin etimadnaməsini qəbul etmiş, xalqlarımız və iki ölkənin dövlət rəhbərləri arasında yaxşı münasibətlərin mövcud olmasının əlaqələrimizin inkişafındakı önəmini vurğulamışdır.
Bu məsələ ilə əlaqədar suallarımızı Maliyyə Nazirliyinin nəzdində Dövlət Sığorta Nəzarəti Xidmətinin rəisi Namiq Xəlilov cavablandırır.
- Namiq müəllim, ölkəmizdə sığorta bazarının bugünkü durumunu qənaətbəxş hesab etmək olarmı? - Öncə diqqətinizə çatdırım ki, maliyyə böhranı ilə əlaqədar 2009-cu və 2010-cu illərdə Azərbaycan sığorta bazarında müvafiq olaraq 9 və 5 faiz azalma müşahidə edilmişdir. Bu da bankların verdiyi kreditlərin məbləğinin və işəgötürənlər tərəfindən işçilərin sığorta etdirilməsinə çəkilən xərclərin azalması ilə bağlıdır. Lakin 2011-ci ildən ölkənin sığorta bazarı yenidən yüksək templə artmağa başlamışdır. Artım ən çox avtonəqliyyat vasitələrinin, əmlakın, tibbi və fərdi qəza sığortalarının hesabına mümkün olmuşdur. Bu sığorta növlərinin könüllü qeyri-həyat sığortasında xüsusi çəkisi təxminən 70 faiz təşkil edir. - Ölkədə fəaliyyət göstərən sığorta şirkətlərinin sayı nə qədərdir və lisenziya hansı müddətə verilir? - Hazırda Azərbaycanda 28 sığorta və 1 təkrarsığorta şirkəti fəaliyyət göstərir. - Ötən il nə qədər sığorta haqqı yığılıb və ödəniş hansı səviyyədə olub? - Hələlik 2011-ci ilin yanvar-oktyabr aylarının statistikası məlumdur. Həmin dövr ərzində 179,1 mln. manat məbləğində sığorta haqqı yığılıb, 48,5 mln. manat məbləğində isə sığorta ödənişi edilib. Bu, ötən ilin müvafiq dövrü ilə müqayisədə təxminən 40 faiz artım deməkdir. Proqnozlarımıza görə, 2012-ci ildə sığorta bazarında 20-30 faiz artım ehtimal olunur. - Sığorta hadisəsi baş verdiyi zaman ödənişdən yayınmaq məqsədi ilə sığorta şirkətləri ya ödənişi gecikdirir, ya da baş verən halın sığorta hadisəsi olmadığını bəhanə gətirirlər. Bu da son nəticədə sığorta bazarında inamsızlığa səbəb olur... - Apardığımız təhlillər göstərir ki, bir çox halda sığorta ödənişinin verilməsindən imtina sığortalının bağladığı sığorta müqaviləsinin şərtləri ilə tanış olmamasından və ya özünün müqavilə öhdəliklərini yerinə yetirməməsindən irəli gəlir. Hüququ pozulmuş sığortalı Maliyyə Nazirliyinin Dövlət Sığorta Nəzarəti Xidmətinə və məhkəməyə müraciət edə bilər. - İstehsalatda bədbəxt hadisələr və peşə əmək qabiliyyətinin itirilməsi halları ilə əlaqədar nə qədər işçi sığortalanıb və sığortaolunanlardan neçə nəfərə sığorta ödənişi edilib? - Ötən ilin 9 ayı ərzində 12932 işəgötürən öz işçilərini sığorta etdirib. Bununla da ölkəmizdə sığortalanmış işçilərin sayı 636994 nəfərə çatmışdır. Sığorta hadisəsi nəticəsində 21 sığorta ödənişi verilmişdir. Ümumi sığorta ödənişi məbləği 152.218,75 manat təşkil etmişdir. Hazırda 46 hadisə üzrə sığorta tələbinə baxılmaqdadır. Bu sığorta tələbləri üzrə təxminən 1.500.000 manat məbləğində sığorta ödənişinin verilməsi gözlənilir.
Könüllü fəaliyyət münasibətlərini tənzimləyən müqavilə barədə məlumat verməyinizi xahiş edirəm.
Əlikram QURBANOV, Bakı şəhəri.
- Könüllü fəaliyyətin iştirakçıları arasında münasibətlər tərəflər arasında yazılı formada bağlanan müqavilə ilə tənzimlənir. Könüllü fəaliyyətin təşkilatçıları tərəfindən cəlb edilmiş könüllülərlə bağlanan müqavilədə aşağıdakılar göstərilir: o müqavilə bağlayan tərəflər haqqında məlumatlar; o tərəflərin hüquq və vəzifələri; o görüləcək işlər və göstəriləcək xidmətlər; o müqavilənin müddəti; o tərəflərin məsuliyyəti; o müqaviləyə xitam verilməsi qaydası. Könüllü fəaliyyətin təşkilatçıları tərəfindən cəlb edilmiş könüllülərlə bağlanan müqavilədə qanunla nəzərdə tutulmuş digər şərtlər də nəzərdə tutula bilər. Könüllü tərəfindən könüllü fəaliyyətin həyata keçirilməsi ilə bağlı üçüncü şəxslərə vurulmuş zərərin ödənilməsi qaydası müqavilə ilə müəyyən olunur. Müqavilədə könüllünün hüquqlarını məhdudlaşdıran müddəaların əks olunması yolverilməzdir. Müqaviləyə tərəflərin razılığı ilə vaxtından əvvəl xitam verilə bilər. Tərəflərdən birinin təşəbbüsü ilə müqaviləyə vaxtından əvvəl xitam verildikdə qarşı tərəfə müqavilənin xitam olunacağı haqqında xəbərdarlıq edilməlidir. Müqavilə üzrə öhdəliklərin yerinə yetirilməməsinə dair əsaslar olduqda tərəflər müqaviləyə xitam verə bilərlər. Müqavilə üzrə tərəflər arasında yaranan mübahisələr qanunvericiliyə uyğun olaraq məhkəmə qaydasında həll edilir.
Azərbaycan