Azərbaycan Respublikasının Prezidenti İlham Əliyev
(mayın 13-də) …Beynəlxalq Velosipedçilər İttifaqının Prezidenti Patrik Mak Quaydı qəbul etmiş, ölkəmizdə ümummilli lider Heydər Əliyevin xatirəsinə həsr olunmuş beynəlxalq velosiped turunun keçirilməsinin əhəmiyyətini və bu beynəlxalq tədbirin təkcə paytaxtı deyil, regionları da əhatə etməsinin önəmini qeyd etmişdir.
(mayın 14-də) …Bolqarıstan Respublikası Xalq Məclisinin sədri xanım Tsetska Tsaçevanın başçılıq etdiyi nümayəndə heyətini qəbul etmiş, ölkələrimiz arasında əlaqələrin zəngin tarixə malik olduğunu və yüksək səviyyədə təmasların səmərəli nəticələr verdiyini diqqətə çatdırmışdır. …ATƏT-in Minsk Qrupunun həmsədrləri İqor Popovu (Rusiya), Robert Bradtkeni (ABŞ), Jak Foru (Fransa) və ATƏT-in hazırkı sədrinin xüsusi nümayəndəsi Anji Kaspşiki qəbul etmiş, Ermənistan-Azərbaycan, Dağlıq Qarabağ münaqişəsinin nizama salınması ilə bağlı danışıqların hazırkı vəziyyəti və perspektivləri ilə bağlı məsələləri müzakirə etmişdir.
(mayın 15-də) …MDB-nin üzvü olan ölkələrin Dövlət Başçıları Şurasının qeyri-rəsmi iclasında iştirak etmək üçün Rusiya Federasiyasının paytaxtı Moskvaya işgüzar səfərə gəlmişdir. …Moskvada MDB-nin üzvü olan ölkələrin Dövlət Başçıları Şurasının qeryi-rəsmi iclasında iştirak etmişdir. …və Moldova Respublikasının Prezidenti Nikolaye Timovtin Moskvada görüşmüş, Azərbaycan ilə Moldova arasında enerji, sərmayələrin yatırılması və digər sahələrdə əməkdaşlığın inkişafı üçün böyük potensialın olduğunu qeyd etmişlər. …və Qırğız Respublikasının Prezidenti Almazbek Atambayev Moskvada görüşmüş, ölkələrimiz arasında ikitərəfli əlaqələrin müxtəlif istiqamətlərdə inkişafından, eləcə də hökumətlərarası komissiyanın fəaliyyətindən məmnunluq ifadə etmişlər.
(mayın 16-da) …Rusiya Federasiyasına səfərini başa vuraraq həmin gün Bakıya qayıtmışdır. …Daxili İşlər Nazirliyinin Zuğulbada inşa edilmiş "Xəzri" İstirahət və Sağlamlıq Mərkəzinin açılışı mərasimində iştirak etmişdir. …Azərbaycan ədəbiyyatının inkişafında mühüm xidmətləri olan Mirvarid Dilbazinin 100 illik yubileyinin layiqincə keçirilməsi haqqında Sərəncam imzalamışdır.
(mayın 17-də) …Özbəkistan Respublikasının ölkəmizdə yeni təyin olunmuş fövqəladə və səlahiyyətli səfiri Şerzod Fayziyevin etimadnaməsini qəbul etmiş, xalqlarımız və iki ölkənin dövlət rəhbərləri arasında yaxşı münasibətlərin mövcud olmasının əlaqələrimizin inkişafındakı önəmini vurğulamışdır.
Elşad Miri: "Azərbaycan ailəsinin bünövrəsində yaşayan İslam prinsiplərinə əməl etməklə ailələrin möhkəmliyini təmin edə bilərik"
Son illər respublikamızda qurulan ailələrin böyük bir hissəsi dağılır. Ölkəmizdə boşanma hallarının artması artıq parlament səviyyəsində müzakirə olunub. Dövlət Statistika Komitəsindən verilən rəsmi məlumata görə, təkcə ötən il dövlət orqanları tərəfindən 89,4 min nikah qeydə alınıb. Əhalinin hər 1000 nəfərinə hesabı ilə 2010-cu ilə nisbətən nikahların sayı 8,9-dan 9,9-a qədər artıb. Bundan başqa, ölkədə 10 801 nikahın pozulması faktı qeydə alınıb ki, bu da 2010-cu illə müqayisədə 1901 fakt artıqdır. Hər bir problemin həlli isə onu doğuran səbəblər aradan qaldırıldıqdan sonra mümkündür. Artıq respublikamızda bu istiqamətdə araşdırmalar aparılmaqdadır. Təkcə dövlət qurumları deyil, vətəndaş cəmiyyəti institutları da tarixən öyündüyümüz ailə dəyərlərinin qorunması istiqamətində tədbirlər görür. Məsələyə münasibət bildirən fəlsəfə doktoru Elnarə Akimovanın sözlərinə görə, Azərbaycan ailəsi dəyərlərinin minillik tarixi var: "Həmin dəyərlər nəsil-nəsil mühafizəkarlığını və yaşarlığını qoruyaraq öz milli mövcudluğunu zamanın sərt sınaqlarından bütöv və zədəsiz çıxara bilir. Məhz o dəyərlər Azərbaycan ailəsini bir model olaraq formalaşdırmağa və dünyaya təqdim etməyə imkan verir. Hansıdır bu dəyərlər? İlk növbədə, ailə məfhumunun özünün bizdə ciddi əhəmiyyət daşıması amili, ona nəsilartımına vəsiqə verən bir müqəddəs nəsnə kimi yanaşılması. Təbii ki, ailəni qurmaq hələ işin o qədər də mürəkkəb, çətin olmayan başlanğıcıdır. Əsas məsələ onun qorunması, möhkəmliyinə çaba göstərilməsidir. Ailənin qorunmasında, onun möhkəmlənməsində rol oynayan dəyərlər qarşılıqlı inam və hörmət hissinin mövcudluğudur. Mən bu fikirdəyəm ki, sevgi ailəyə aparan ilkin vasitədir, ailənin qurulması üçün önəmli olan əhəmiyyətli məqamdır, lakin onun qorunması, davamlılığı üçün yeganə şərt deyildir. Ailə civarında münasibətlərin harmoniyasının yaradılmasında sevgi növbənöv modifikasiyalara məruz qalır, yəni şəklini dəyişir. Başqa dəyərlər önə çıxır, başqa meyarlar dominanta çevrilir. Sevgi sanki öz rolunu oynayıb səssizcə öz sakitliyinə çəkilir. Əlbəttə, əslində bu, bir görüntüdür, o dəyərlər ki, minillik Azərbaycan ailəsi ona tapınaraq yaşayır, alt qatda olan sevgidən rişələnir. Ailənin möhkəmliyi də məhz bu məqamda, onların bu missiyanı nə dərəcədə realizə edə bilməsi ilə şərtlənir, yəni sevgi, qarşılıqlı hörmət və inam, bişməyin-ailə bütövlüyünə nail olmağın yolu bu mərhələlərdən keçir". İlahiyyatçı Elşad Mirinin yanaşmasına görə isə, milli dəyərlər bəzi hallarda öz yerini dırnaqarası dəyərlərə təslim edir: "Buna görə də bəzi hallarda Azərbaycan ailəsində müəyyən dəyişikliklərin şahidi oluruq. Bunların qarşısını almaq üçün biz keçmiş tariximizə baxmalıyıq.Yəni nənə - babalarımızın qoruyub bizə ötürdüyü həmin ailə dəyərləri necə formalaşıbsa, bu gün də o dəyərləri qoruyub saxlayıb ailələrimizin yaşamını, varlığını ona uyğun davam etdirə bilərik. Keçmişdə statistika aparılmırdı, amma ümumi müşahidələr nəticəsində görürdük ki, həmin illərdə boşanma nə qədər az olurdu, amma günümüzdə boşanmaların nə qədər sadələşdiyinin və çoxaldığının şahidi ola bilərik. Bütün bunlarda da degenerasiya, əxlaqi tənəzzül olduğu ortaya çıxır. Ona görə də biz bu təməlin qorunmasında illərin sınağından çıxan və Azərbaycan ailəsinin bünövrəsində yaşayan İslam prinsiplərinə əməl etməklə ailələrin möhkəmliyini təmin edə bilərik".
Könüllü fəaliyyət münasibətlərini tənzimləyən müqavilə barədə məlumat verməyinizi xahiş edirəm.
Əlikram QURBANOV, Bakı şəhəri.
- Könüllü fəaliyyətin iştirakçıları arasında münasibətlər tərəflər arasında yazılı formada bağlanan müqavilə ilə tənzimlənir. Könüllü fəaliyyətin təşkilatçıları tərəfindən cəlb edilmiş könüllülərlə bağlanan müqavilədə aşağıdakılar göstərilir: o müqavilə bağlayan tərəflər haqqında məlumatlar; o tərəflərin hüquq və vəzifələri; o görüləcək işlər və göstəriləcək xidmətlər; o müqavilənin müddəti; o tərəflərin məsuliyyəti; o müqaviləyə xitam verilməsi qaydası. Könüllü fəaliyyətin təşkilatçıları tərəfindən cəlb edilmiş könüllülərlə bağlanan müqavilədə qanunla nəzərdə tutulmuş digər şərtlər də nəzərdə tutula bilər. Könüllü tərəfindən könüllü fəaliyyətin həyata keçirilməsi ilə bağlı üçüncü şəxslərə vurulmuş zərərin ödənilməsi qaydası müqavilə ilə müəyyən olunur. Müqavilədə könüllünün hüquqlarını məhdudlaşdıran müddəaların əks olunması yolverilməzdir. Müqaviləyə tərəflərin razılığı ilə vaxtından əvvəl xitam verilə bilər. Tərəflərdən birinin təşəbbüsü ilə müqaviləyə vaxtından əvvəl xitam verildikdə qarşı tərəfə müqavilənin xitam olunacağı haqqında xəbərdarlıq edilməlidir. Müqavilə üzrə öhdəliklərin yerinə yetirilməməsinə dair əsaslar olduqda tərəflər müqaviləyə xitam verə bilərlər. Müqavilə üzrə tərəflər arasında yaranan mübahisələr qanunvericiliyə uyğun olaraq məhkəmə qaydasında həll edilir.
Azərbaycan
Elşad Miri: "Azərbaycan ailəsinin bünövrəsində yaşayan İslam prinsiplərinə əməl etməklə ailələrin möhkəmliyini təmin edə bilərik"