Sentyabrın 1-2-də Xaçmaz Olimpiya İdman Kompleksində “Heydər Əliyev İli”nə həsr edilmiş yeniyetmələr (U-12 və U-15) arasında sərbəst güləş üzrə Xaçmaz rayon açıq birinciliyi keçirilib.

Birinciliyin açılış mərasimində Ümummilli Lider Heydər Əliyevin və Azərbaycan Respublikasının suverenliyi, müstəqilliyi yolunda canlarından keçmiş qəhrəman övladlarımızın əziz xatirəsi bir dəqiqəlik sükutla anılıb. Sonra Dövlət Himni səsləndirilib. Yarışda Bakı şəhəri ilə yanaşı, Quba, Xaçmaz, Şabran və Siyəzən rayonlarından ümumilikdə 200 nəfərə yaxın idmançı 12 çəki dərəcəsində mübarizə aparıb.

Birincilikdə iştirak edən Azərbaycan Həmkarlar İttifaqları İdman Təşkilatları Assosiasiyası İctimai Birliyinə daxil olan “Zenit” İdman Cəmiyyətinin yetirmələri də uğurlu çıxışları ilə fərqləniblər. Belə ki, Cəmiyyətin yetirmələri Adəm Usmanov (38 kq.), Sənan Baxşıyev (57 kq.), Cəsur Əzizli (62 kq.) və Əli Hacıyev (68 kq.) birinci yeri tutublar. Aydın Abbasov ( 32 kq.) və Hüseyn İlyaszadə (42 kq.) isə ikinci olublar.

Məşqçi-müəllim Amil Abdullayevin yetirmələri bu nəticə ilə komanda hesabında fəxri kürsüdə yer alıblar.   

Sonda qaliblər diplom və medallarla təltif olunublar.