Azərbaycan bayrağı Ülfət qəzeti Azərbaycan həmkarlar ittifaqı konfederasiyası Ülfət qəzeti


AHİK İcraiyyə Komitəsinin iclası keçirilib, bəyanat qəbul olunub

AHİK sədri, Milli Məclisin deputatı Səttar Möhbalıyev iclasda Avropa Şurası Parlament Assambleyasının (AŞPA) Azərbaycana qarşı qərəzli mövqeyinə münasibət bildirib.

31.01.2024 12:51
0
A+
A-

Yanvarın 26-da Azərbaycan Həmkarlar İttifaqları Konfederasiyası (AHİK) İcraiyyə Komitəsinin iclası keçirilib.

AHİK sədri, Milli Məclisin deputatı Səttar Möhbalıyev iclasda Avropa Şurası Parlament Assambleyasının (AŞPA) Azərbaycana qarşı qərəzli mövqeyinə münasibət bildirib.

O, AŞPA-nın Azərbaycan nümayəndə heyətinin etimadnaməsini təsdiqləməməsini qurumun məkrli niyyətləri ilə əlaqələndirib. AHİK sədrinin sözlərinə görə, avropalı deputatlar davranışları ilə təmsil olunduqları qurumu korrupsiya yuvasına çeviriblər və məhdud siyasi qüvvələrin maraqlarına xidmət edirlər. Qeyd edib ki, AŞPA-nın bu mövqeyi insan haqları ilə deyil, bilavasitə siyasi amillərlə bağlıdır: “Bu qurum əslində funksiyalarının icrası ilə məşğul olmur, daha çox dövlətlərin daxili işlərinə qarışır. Prosesləri isə olduğu kimi yox, istədiyi kimi qiymətləndirir. Bu da onun qərəzli və riyakar mövqeyindən irəli gəlir”.

Səttar Möhbalıyev vurğulayıb ki, Azərbaycan güclü dövlətdir, müstəqil siyasətə malikdir, cəmiyyətimiz isə tam yetkin və bütövdür. Odur ki, hansısa dövlətin və təşkilatın Azərbaycanla hədə dili ilə danışmağa hünəri çatmaz.

Tədbirdə çıxış edən İcraiyyə Komitəsinin üzvləri AŞPA-nın ölkəmizlə bağlı mövqeyini qınayıb və Azərbaycan nümayəndə heyətinin etimadnaməsini təsdiqləməməsini qərəzli yanaşma hesab ediblər. Bildirilib ki, Avropa Şurası və onun parlamenti ölkəmizə heç bir uğur gətirmədi, gözləntiləri doğrultmadı. Ona görə də bu təşkilatın ölkəmiz üçün önəmi qalmayıb.

Həmçinin İcraiyyə Komitəsinin üzvləri Azərbaycan nümayəndə heyətinin AŞPA ilə əməkdaşlığı və təşkilatda iştirakı dayandırmaqla bağlı qərarını ləyaqətli addım adlandırıb və alıqşlayıblar.

Sonda İcraiyyə Komitəsi məsələ ilə bağlı bəyanat qəbul edib.

AHİK-in Bəyanatı

“Avropa Şurası Parlament Assambleyası (AŞPA) qış sessiyasının ilk iclasında Azərbaycan nümayəndə heyətinin etimadnaməsini təsdiqləmədi. Bu qərar və onun qəbul edilməsi üçün göstərilən səbəblər tamamilə əsassız və böhtandır, ölkəmizə uzun illərdir sərgilənən ikili standartların, qərəzli yanaşmanın bilavasitə davamıdır.

Azərbaycan cəmiyyətinə və dünya ictimaiyyətinə AŞPA və bu kimi təsisatların məkrli siyasəti çoxdan məlumdur. Qurumun fəaliyyəti, demək olar ki, bir neçə dövlətin xudbin maraqları üzərində qurulub və onların əlində siyasi təzyiq alətinə çevrilib.

Bu Qərb təsisatı Azərbaycana münasibətdə daha riyakar və ikiüzlü mövqe nümayiş etdirir. Baxmayaraq ki, ölkəmiz AŞPA-ya böyük ümidlərlə üzv olmuşdu və xalqımız bunu yüksək rəğbətlə qarşılamışdı. Bir inam var idi ki, insan hüquqlarını əsas götürən bu təşkilat 20 faiz ərazisi işğal edilmiş, etnik təmizlənməyə məruz qalmış, bir milyondan artıq qaçqını və köçkünü olan ölkənin haqq işinə dəstək verəcək, ədalətin bərqərar olmasına çalışacaq. Amma, təəssüflər olsun ki, insan hüquqları, demokratiya və qanunun aliliyinin müdafiəsini özünün əsas məşğuliyyəti elan edən Avropa Şurası və onun Parlament Assambleyası heç bir real addımlar atmadı, işğalçı dövlətə sanksiya tətbiq etmədi, münaqişənin həlli ilə bağlı bütün məsuliyyəti ATƏT-in Minsk qrupunun üzərinə yıxaraq götürdüyü öhdəliklərdən boyun qaçırdı. Əslində isə AŞPA-nın kəskin və qəti qərar qəbul etməsi üçün kifayət qədər faktları var idi. Ermənilər tərəfindən insanlarımızın öz yurdundan qovulması, məcburi köçkün halında yaşaması, evlərinin talan edilməsi, əmlaklarının mənimsənilməsi onların gözləri qarşısında baş vermişdi. Hətta yüzlərlə daşınmaz tarixi, mədəni və dini abidənin vandalizmə məruz qalması, təyinatına uyğun olmayan formada istifadə edilməsi, habelə məscidlərin təhqir olunması, orada mal-qara saxlanması barədə faktlar dəlillərlə sübut edilmişdir. Qurum isə əksinə, Azərbaycan tərəfinin irəli sürdüyü təklifləri, münaqişə ilə bağlı müzakirəyə çıxartmaq istədiyi məsələləri qulaqardına vurmaqla daha çox Ermənistanın işğal siyasətini ört-basdır edirdi. Bu gün isə öz ərazi bütövlüyünü, suverenliyini təmin edən, separatçı qüvvələri zərərsizləşdirən, məcburi köçkünlərin pozulmuş hüquqlarını bərpa edən, ümumilikdə regionun hərtərəfli inkişafına geniş imkanlar açan Azərbaycanı hədəf almaq, onun sülh səylərinə süni əngəllər yaratmaq bu qurumun məkrli və hiyləgər planlarından xəbər verir. Aydın görünür ki, Azərbaycanın gündən-günə inkişafı, artan iqtisadi qüdrəti, tam müstəqil siyasət həyata keçirməsi dünyanın bəzi dövlətlərini, o cümlədən Fransa və Almaniyanı  çox narahat edir. Məhz bu ölkələrin canfəşanlığı və diktəsi ilə oynayan AŞPA anti-Azərbaycan, islamafobiya siyasətini həyata keçirir. İkili standartların tətbiqində baş rolda çıxış edir. Azərbaycana mane olmaq üçün isə müxtəlif çirkin vasitələrlə, xüsusən regional və beynəlxalq təşkilatların əli ilə Azərbaycanın daxili işlərinə qarışmağa cəhdlər edilir, haqq işinə kölgə salmağa çalışılır, qərəz və böhtan dolu qərarlar qəbul olunur.

Bu, erməni lobbisindən qidalanan Azərbaycanofobiya və İslamofobiya təfəkkürlü avropalı deputatların korrupsiya və rüşvətxor əməllərinin təzahürüdür. Bu cür qərarlarla əslində qurumun əsl mahiyyəti ortaya çıxır, dünya ictimaiyyətinin gözündən düşür.

Azərbaycan Həmkarlar İttifaqları Konfederasiyasının İcraiyyə Komitəsi    AŞPA-nın Azərbaycana olan bu yanaşmasını tamamilə əsassız adlandırır və şiddətlə qınayır.

Eləcə də biz Azərbaycan nümayəndə heyətinin AŞPA ilə əməkdaşlığı və təşkilatda iştirakını qeyri-müəyyən müddətə dayandırmaq qərarını düzgün hesab edir və alqışlayırıq. Ona görə ki, bu qurum insan haqlarının müdafiəçisi adı altında gizlənərək xristian klubu və diaspor təşkilatı kimi fəaliyyət göstərir, öz funksiyalarını bir kənara qoyaraq müəyyən qrupların eqoist maraqlarına xidmət edir. Həm də dünyada artıq AŞPA xarakterli təşkilatlara yer qalmadığı, zamanın tələblərinə cavab vermədiyi üçün bu qurumla əməkdaşlıq əhəmiyyətsizdir və vaxt itkisindən başqa bir şey deyil.

Həmçinin biz bəyan edirik ki, AŞPA-nın ölkəmizə bu cılız davranışı heç nəyi dəyişməyəcək. Azərbaycan güclü dövlətdir, regionun lideri, dünya, o cümlədən Avropa üçün son dərəcə əhəmiyyətli və faydalı ölkədir. Odur ki, heç bir dövlət və ya təşkilat ölkəmizlə hədə və təhdid dili ilə danışa bilməz. Agah olsunlar ki, Azərbaycan öz müstəqil və suveren siyasətini bundan sonra da uğurla davam etdirəcək”.

ETİKETLƏR:

Foto