2012-ci il sentyabrın 11-də Pakistanın Karaçi şəhərindəki “Ali Enterprises” fabrikində baş verən dünyanın ən dəhşətli sənaye yanğınlarından biri nəticəsində 250-dən çox işçi həlak olmuş, 50-dən çox işçi yaralanmışdır.

İndustriALL-ın üzv təşkilatı olan Milli Həmkarlar İttifaqları Federasiyası (NTUF), Pakistan Əmək Təhsili və Tədqiqat İnstitutu (PILER), “Təmiz Geyim Kampaniyası” və digər müttəfiqlər, o cümlədən “UNI” Qlobal İttifaqı, alman pərakəndə satış şirkəti “KiK”dən lazımi təzminat almaq üçün illər boyu intensiv kampaniya apardı.

2016-cı ilin sentyabrında “KiK”in yanğın zamanı həlak olanların ailələrinə 5,2 milyon ABŞ dolları məbləğində təzminat ödəməsi ilə bağlı razılaşma əldə olunub.

Banqladeşdə milyonlarla geyim işçisi üçün iş yerlərini daha təhlükəsiz edən beynəlxalq müqavilənin Pakistanda da imzalanması bu ölkənin tikiş fabriki işçilərinin iş yerində daha etibarlı gələcəyi deməkdir.

Bu günə qədər 72 brend və pərakəndə satıcı tərəfindən imzalanmış beynəlxalq müqavilə Pakistanda geyim və tekstil sənayesi tədarükçülərini əhatə edən əməyin mühafizəsi və təhlükəsizliyi proqramının həyata keçirilməsini nəzərdə tutur. Bir tərəfdən “İndustriALL” və “UNI” qlobal birlikləri, digər tərəfdən geyim markaları və pərakəndə satış şirkətləri arasında hüquqi cəhətdən məcburi olan bu müqavilə üç il müddətinə bağlanıb və 2023-cü ildən qüvvəyə minəcək.

“İndustriALL” Qlobal Həmkarlar İttifaqının Baş katibi Atle Hoye deyib ki, Pakistandakı üzv təşkilatlarımızla birlikdə faciəvi yanğın qurbanlarının xatirəsini anırıq və geyim sənayesi işçiləri üçün təhlükəsiz iş yerləri təmin etmək öhdəliyimizi təsdiqləyirik. Müqavilənin Pakistanda həyata keçirilməsi ilə qarşısı alına bilən ölümcül qəzalar da daxil olmaqla qəzaların sayı sürətlə azalacaq. İşçilər əməyin mühafizəsi üzrə təlim keçəcək, bu, onları gücləndirəcək və ümid edirəm ki, onlar öz hüquqları uğrunda birlikdə mübarizə aparmaq üçün həmkarlar ittifaqında fayda görəcəklər.