GDL (Gewerkschaft DeutscherLokomotivführer) Həmkarlar ittifaqı Almaniyanın dəmir yolu operatoru “Deutsche Bahn” şirkətinin işçilərini noyabrın 15-i axşam saatlarından etibarən tətil etməyə çağırıb. Həmkarlar ittifaqının fikrincə, 20 saatlıq tətil əməkhaqqının artırılması ilə bağlı danışıqlar zamanı qabaqlayıcı tədbir kimi zəruridir.

GDL artan inflyasiya səbəbindən işçilərin maaşının ayda 555 avro artırılmasını və 3000 avroya qədər birdəfəlik ödəniş tələb edir. Bundan əlavə, həmkarlar ittifaqı əməkhaqqını azaltmadan iş vaxtının həftədə 38 saatdan 35 saata endirilməsinə nail olmaq niyyətindədir. Ötən həftə başlayan danışıqlar noyabrın 15-dən davam etdirilir.