İslahatlara qarşı
Hökumətin həmkarlar ittifaqları ilə danışıqlar masası arxasına oturmaması səbəbindən “SAK” dekabrın 14-də müxtəlif sənaye sahələrində genişmiqyaslı tətillər keçirib, aksiyalarda 100 minə yaxın insan iştirak edib
![](/Uploads/Thumbs/5a8c532b-de7e-48cb-8af0-1584b3d2fa6c_1024x582.jpg)
Fevralın 1-də Finlandiyada “SAK” və “STTK” həmkarlar ittifaqı mərkəzlərinin çağırışı ilə genişmiqyaslı nümayiş keçiriləcək. Finlandiya Həmkarlar İttifaqları Konfederasiyasının (SAK) rəsmi saytına görə, aksiya Helsinkidə Senat meydanında baş tutacaq və məqsəd hökumətə əmək bazarı islahatlarını ləngitməli olduğunu bildirməkdir. Həmkarlar ittifaqları hökumətin təşkil etdiyi üçtərəfli işçi qruplarında və debatlarda iştirak edərək, parlament dinləmələrində bu islahatların artıq insanlara nə qədər ağır zərbə vurduğunu bildirib. Həmkarlar ittifaqları finlərin iş həyatına və rifahına xələl gətirən hökumətə islahatların dayandırılmasına dair siqnal göndərir. Bu arada hökumət bu siqnalları eşitmək istəmir. Finlandiyanın İqtisadi İşlər və Məşğulluq Nazirliyindən verilən məlumata görə, o, ixrac sənayesində əməkhaqqının artırılmasının mümkünsüz olacağı qanun hazırlayır. Üstəlik, qanunun bu ilin dekabrında qüvvəyə minməsi gözlənilir.
İxracyönümlü əməkhaqqı modeli, ixrac hesabına yaşayan Finlandiya kimi açıq iqtisadiyyat üçün təbiidir. Məşğulluq naziri Arto Satonen deyir ki, ölkəmiz təkcə beynəlxalq rəqabətdə uğur qazanmamalı, həm də rifah cəmiyyətinin xərclərini çəkə bilməlidir. İdarədən bildirilib ki, işçi qrup formalaşdırmağa başlayıblar, həmkarlar ittifaqı təşkilatları da bu qrupa dəvət olunub. Mayın sonuna kimi hökumətə hesabat təqdim edəcək, sonra isə qanunvericiliyə dəyişikliklərlə bağlı təkliflər sentyabra qədər parlamentə təqdim olunacaq. Bundan əvvəl üç həmkarlar ittifaqı konfederasiyası - “SAK”, “Akava” və “STTK” birgə bəyanat yayaraq, kollektiv fəaliyyət qanununun təklif olunan islahatını pisləyiblər. Onlar hesab edirlər ki, dəyişikliklər əmək bazarında disbalans yaradacaq və işəgötürənlərin birtərəfli hərəkətlərini gücləndirəcək. Həmkarlar ittifaqları islahatları qəbul etməyəcəyini və qaydaları daha da sərtləşdirməyə ehtiyac olmadığını bildirib, çünki mövcud qaydalar artıq bir sıra məhdudiyyətlər tətbiq edir. Həmkarlar ittifaqları həmçinin hökuməti onlarla məsləhətləşmədiyi və ya təklif olunan dəyişikliklərin təsirinə dair hər hansı real qiymətləndirmə vermədiyi üçün tənqid edib. Hökumətin həmkarlar ittifaqları ilə danışıqlar masası arxasına oturmaması səbəbindən “SAK” dekabrın 14-də müxtəlif sənaye sahələrində genişmiqyaslı tətillər keçirib, aksiyalarda 100 minə yaxın insan iştirak edib.