Hökumətlərin, işəgötürənlərin və işçilərin nümayəndələri tikinti materialları sahəsində, o cümlədən sement istehsalı sahəsində problemləri və gələcək imkanları müzakirə etmək üçün Cenevrədə toplaşıblar.

Bu xüsusda ilk dəfə keçirilən toplantı Beynəlxalq Əmək Təşkilatı (BƏT) tərəfindən təşkil olunub. O, BMT-nin Ətraf Mühit Proqramı, İqtisadi Əməkdaşlıq və İnkişaf Təşkilatı və Birləşmiş Millətlər Təşkilatının Sənaye İnkişafı Təşkilatının yüksək səviyyəli ekspertlər qrupunu bir araya toplayıb.

“Tikinti materialları sənayesi qlobal iqtisadiyyatın təməl daşıdır və hazırda sürətli texnoloji dəyişiklik səbəbindən kritik yol ayrıcındadır. Tədbirdə əldə olunan nəticələr və tövsiyələr sənayenin aşağı karbonlu iqtisadiyyatın və layiqli işin tələblərinə cavab verməsində, eləcə də artan mənzil və infrastruktur ehtiyaclarını qarşılamasında böyük köməklik göstərəcək”, - deyə BƏT-in Sənaye Siyasəti Departamentinin direktoru və iclasın Baş katibi Frank Haqemann bildirib.

BƏT-in üçtərəfli təmsilçiləri dayanıqlı müəssisələr, xüsusilə mikro, kiçik və orta müəssisələr üçün əlverişli şəraitin yaradılmasına dəstək verməyə çağırıblar ki, onlar sənayenin aşağı karbonlu iqtisadiyyata keçidində iştirak etməyə hazır olsunlar. Sahədə əmək münasibətlərinin düzgün təsnifatının təmin edilməsi, yeni tikinti materiallarından istifadənin səbəb olduğu peşə xəstəliklərinin monitorinqi və əmək müfəttişliyi sistemlərinin gücləndirilməsinin vacibliyi vurğulanıb.

Görüşdə qadın və kişilərə bərabər imkanların və münasibətlərin sahənin gələcəyi üçün vacibliyi qeyd olunub. Məlumatların toplanmasının təkmilləşdirilməsi və sektorlar üzrə əməyin qiymətləndirilməsinin aparılması məlumatlı siyasətin hazırlanması üçün əsas elementlər kimi vurğulanıb.

Nümayəndələr ədalətli keçidi dəstəkləmək üçün bacarıqların inkişafı və davamlı təlimə qoyulan investisiyaların əsas əhəmiyyət kəsb edəcəyini, işçilərin və müəssisələrin sənayenin dəyişən tələblərinə uyğunlaşmasına imkan verəcəyini, eyni zamanda yenilik, məhsuldarlıq və davamlılığı stimullaşdıracağını qəbul ediblər. Sosial müdafiə sistemləri ədalətli keçidi təşviq edərək bütün işçilərin və müəssisələrin davamlılığını artırmaq üçün də vacib olacaqdır.

Görüşün razılaşdırılmış nəticələri sənayedə yaşayış minimumunun tətbiqi ilə bağlı təlimat verir, transmilli müəssisələr və sosial siyasətlə bağlı BƏT prinsiplərinin Üçtərəfli Bəyannaməsinin irəli sürülməsinin vacibliyini vurğulayır. Dövlət satınalmalarının əmək hüquqlarına, sosial dialoqa və sənayedəki işçilərin müdafiəsinə töhfə verməsinin təmin edilməsi də qeyd olunur. Bu tövsiyələrin mərkəzində sosial dialoqun və əmək sahəsində əsas prinsip və hüquqların vacib rolu dayanır.