Ötən il sentyabrın 27-də başlayan və 44 gün davam edən Vətən müharibəsi nəticəsində qazanılan tarixi qələbəni çoxdan gözləyirdik.

Azərbaycanda hər kəs kimi “BOS-Şelf” MMC-nin çoxsaylı kollektivi də bu möhtəşəm Zəfərin ildönümünü təntənəli şəkildə qeyd etdi. Belə ki, Zəfər Bayramı Günü şirkət rəhbərliyi şəhidlərin xatirəsini əbədiləşdirmək məqsədilə ağacəkmə kampaniyasına başladı. Həmin kampaniya çərçivəsində Vətən müharibəsində şəhid olan igid övladlarımızın hər birinin xatirəsinə ağac əkilməsi nəzərdə tutulub.

Noyabrın 8-də tarixi qələbəmizin memarı olan şəhidlərin əziz xatirəsi ehtiramla anıldı. Şirkətin baş direktor əvəzi Nazim Hüseynov şirkət ərazisində hazırlanmış “Zəfər Parkı”nın açılış mərasimində çıxış etdi və 44 günlük zəfər döyüşləri barədə geniş məlumat verdi, açılışa toplanan hər kəsi təbrik etdi. Şirkətin qazi işçiləri öz ürək sözlərini söylədilər. “Zəfər Parkı”nda işlər davam edir və burada quraşdırılacaq xüsusi lövhələr üzərində 44 gün ərzində gedən döyüşlərdə şəhid olan 2904  hərbçimiz və işğaldan azad edilən rayonlarımız barəsində  məlumatlar öz əksini tapacaq.

Şirkətin 58 işçisi Vətən müharibəsində iştirak edib. Həmin qəhrəman Vətən övladlarından 4 nəfəri yaralanmış, 9 nəfər isə ciddi şəkildə xəstələnib. Onların hər birinin əməliyyat və müalicə xərcləri  şirkət və onun həmkarlar ittifaqı tərəfindən qarşılanıb. Müharibə dövründə döyüşçü-işçilərin əməkhaqqı ikiqat ödənilmiş, onların ailələrinin ehtiyacları daim diqqət mərkəzində saxlanılmış  və döyüşlərdən qayıdandan dərhal sonra onların hər birinin maaş kartına 200 (iki yüz) manat və “Zəfər Günü” bayramı münasibətilə də hər bir qazinin hesabına 200 (iki yüz) AZN köçürülmuşdur.

Şirkət rəhbərliyi müharibə veteranlarına daim xüsusi həssaslıqla yanaşır. Belə ki, işlə təmin olunmaq məqsədilə bu ilin yanvar - noyabr aylarında Vətən müharibəsi iştirakçısı olan  578  nəfərin siyahısı tutulub. Nəticədə növbəlilik əsasında onların müxtəlif peşələr üzrə təlimlərə cəlb edilməsi planlaşdırılıb. Artıq həmin müharibə veteranlarından 48  nəfər şirkətin təlim mərkəzinə qəbul olunub,  9 nəfər veteran isə fəaliyyətə yararlı müxtəlif peşə sahibləri olduqları üçün birbaşa işə qəbul edilmişdir.

Onu da qeyd etmək lazımdır ki, şirkət rəhbərliyi və həmkarlar ittifaqı şəhid ailələrinin və qazilərimizin sağlamlıqla bağlı və sosial xarakterli problemlərinin həllini də daim diqqət mərkəzində saxlayır. Belə ki, kran operatoru olan şəhid atası Namiq Kəlbiyevin ailəsinə 11.000 AZN  maddi yardım göstərilib. Quraşdırıcı Mehman Məmmədovun oğlu olan Vətən müharibəsi veteranı, eyni zamanda döyüşlərdə göstərdiyi igidliyə görə bir çox medallara layiq görülən Hünər Məmmədovla şirkət rəhbərliyinin görüşü keçirilib, həmçinin qəhrəman qazimizə 2.000 AZN  mükafat verilib.

Bəzən şirkətə burada çalışmayan qazilər də kömək üçün müraciət edirlər. Təqdirəlayiqdir ki, onların müraciəti də diqqətdən kənarda qalmır. Məsələn, müalicəsinə və ailəsinin sosial durumunun ağır olmasına görə yardım məqsədilə müraciət etmiş Vətən müharibəsi qazisi Eyyub Famil oğlu Dadaşovun müalicəsi təşkil edilib, həmçinin qazinin ailəsinə bir neçə dəfə maddi yardım göstərilmişdir.

Yeri gəlmişkən onu da qeyd edək ki, tarixi Zəfərlə başa çatan 44 günlük Vətən müharibəsi ərzində şirkətin həm rəhbər heyəti, həm  də sıravi işçiləri mütəmadi olaraq cəbhə bölgələrinə səfərlər etmiş, qəhrəman zabit və əsgərlərimizə istər maddi, istərsə də mənəvi dəstəklərini əsirgəməmişlər. Belə ki, “Bos-Şelf” tərəfindən Silahlı Qüvvələrimizə təxminən 100.000 (yüz min) manatlıq ehtiyac duyulan ləvazimatlar çatdırılıb. Bununla da kifayətlənməyən şirkət rəhbərliyi Silahlı Qüvvələrə Yardım Fonduna  1 000 000 (bir milyon) AZN, adıçəkilən müəssisənin həmkarlar ittifaqı və işçiləri isə ayrılıqda  185 000 (yüz səksən beş min) AZN  pul vəsaiti köçürüblər.

Qadın və Uşaqların Təhsilinə Dəstək İstehsalat Birliyinin Zəfər Günü şəhid övladları üçün təşkil etdiyi tədbirin maliyyə xərclərini “BOS-Şelf” şirkətinin kollektivi öz üzərinə götürmüşdür.

“Bos-Şelf” MMC-nin rəhbərliyi və kollektivi Zəfər Bayramı münasibətilə Azərbaycan xalqını ürəkdən təbrik  edir, bu tarixi qələbənin memarı olan şəhidlərimizin ruhuna sonsuz ehtiramını bildirir, qazilərimizə sağlamlıq arzulayır, Vətən müharibəsinin bütün iştirakçılarına sonsuz minnətdarlığını çatdırır. 

Allahyar ƏYUBOV,

“BOS-Şelf” MMC Həmkarlar İttifaqı Komitəsinin sədri