Yeni tədris ilinin başlanmasına sayılı günlər qalıb. Günlərinin böyük hissəsini məktəblərdə, universitetlərdə keçirən şagird və tələbələr çox zaman gündə iki dəfə burada yemək yeyirlər. Buna görə də onların düzgün, balanslı, sağlam şəkildə qidalanmaları çox vacibdir. Nəzərə də alsaq ki, bir çox tələbə, şagird yeməyini məhz təhsil müəssisəsinin bufetindən alır, buna görə də bufetlərdəki qidaların tərkibi, keyfiyyəti önəmli məsələdir.

Məsələ ilə bağlı danışan qida eksperti Asim Vəliyev təəssüflə qeyd edib ki, bir çox təhsil müəssisəsinin bufetlərində təklif edilən qidalar sağlam deyil və şagirdlərin, tələbələrin ehtiyacı olan qida maddələrini tam təmin edə bilmir. O, bufetlərdəki qidaların tərkibinə də toxunub:

“Bufetlərdə ən çox satılan qidalar arasında fastfud qidalar, xüsusilə hamburgerlər, pizza, qızardılmış yeməklər, kartof-fri və s. kimi yüksəkkalorili, lakin qida dəyəri aşağı olan qidalar üstünlük təşkil edir. Bu cür qidalarda doymuş yağ, şəkər və duz miqdarı yüksəkdir. Uzunmüddətli istehlak edildikdə müxtəlif sağlamlıq problemlərinə səbəb ola bilir. Alternativ olaraq bəzi bufetlərdə salatlar, sulu yeməklər və təzə meyvə kimi sağlam qidalar da təqdim olunur. Amma onların keyfiyyəti, təmizliyi və qida dəyəri də şübhə doğuran məqamlardır”.

İstifadə edilən məhsullarda nəyə diqqət edilməlidir?

Ekspertin sözlərinə görə, bufetlərdə sağlam və balanslı qidalanmanı təmin etmək üçün daha çox təzə və keyfiyyətli məhsullara üstünlük vermək vacibdir:

“Məsələn, təzə salatlar, tərəvəz şorbaları və qızardılmamış, qaynadılmış yeməklər daha yaxşı seçimdir. Bu qidalar orqanizmin ehtiyac duyduğu vitaminlər, minerallar və liflərlə zəngindir.

Satılan salatlara və sulu yeməklərə xüsusilə diqqət etməliyik. Salatların tərkibində təzə tərəvəzlərdən, məsələn, pomidor, xiyar, kahı və s istifadə olunmalıdır. Bura əlavə edilən souslar və ədviyyatlar da sağlam olmalıdır. Əks halda yüksək yağ və duz tərkibli souslar salatın qida dəyərini aşağı salır. Eyni zamanda sulu yeməklər təzə və az yağlı olmalı, doyurucu, lakin ağır olmayan qidalardan hazırlanmalıdır. Bu səbəblə tərəvəzli yeməklər və ya qızardılmadan qaynadılmış toyuq əti ilə hazırlanan şorbalar yaxşı seçimdir”.

Müsahib bufetlərin gigiyenası mövzusuna da toxunub:

“Təəssüf ki, bəzi müəssisələrdə gigiyenik şəraitə kifayət qədər diqqət yetirilmir və bu da qidaların keyfiyyətini aşağı salır. Təmiz və gigiyenik şəraitdə hazırlanan yeməklər hər zaman sağlamlığa daha az ziyan vurur və qida zəhərlənməsi kimi halların qarşısını alır.

Bufetlərdə daha çox sağlam qidaların təqdim olunması şagirdlərin uzunmüddətli sağlamlığına müsbət təsir göstərə bilər.

Bunun üçün təhsil müəssisələri, qida tədarükçüləri və valideynlər birgə çalışmalıdırlar. Bu yolla təhsil müəssisələrində şagird və tələbələrin sağlamlığını qorumaq mümkündür”.

Leyla BƏHRAMQIZI