Qızıl və bürünc medal qazanıblar
.
Serbiyanın Novi Sad şəhərində güləş üzrə U-17 Avropa çempionatında Azərbaycan Həmkarlar İttifaqları İdman Təşkilatları Assosiasiyasının “Pəhləvan” İdman Klubunun yunan-Roma güləşçiləri Turan Daşdəmirov (51 kq.) qızıl və Əli Nəzərov (55 kq.) isə bürünc medal qazanıblar.
Turan Daşdəmirov (məşqçi-müəllimi Akif Əliyev) rusiyalı Bərəkatullah İsayevə (8:0) və yunanıstanlı Sotirios Ntontosa (11:2) tam üstünlüklə qalib gəlib. 1/4 finalda ukraynalı Maksut Sultanovdan (7:4) güclü olan Avropa və dünya çempionumuz yarımfinalda gürcüstanlı Nika Tsetsxladzeni (3:0) məğlub edib. Turan həlledici görüşdə ermənistanlı Yurik Mxitaryana tam üstünlüklə (8:0) qalib gələrək qitə çempionu olub. Bu, T.Daşdəmirovun 2-ci Avropa çempionluğudur.
Əli Nəzərov (məşqçi-müəllimi Azər Hüseynov) ilk görüşdə ermənistanlı Aleksandr Aydoyevi məyus edib. Daha sonra serbiyalı Kristian Dobiyə tam üstünlüklə (9:0) qalib gələn həmyerlimiz adını yarımfinala yazdırıb. Əli finalın bir addımlığında bolqarıstanlı Alyoşa İliyevə sonuncu xal prinsipinə görə (1:1) məğlub olub. Bürünc medal uğrunda görüşdə isə ukraynalı Daniil Suşçenkoya 7:3 hesabı ilə qalib gəlib.